Presidentja e Republikës së Kosovës, Vjosa Osmani, po përfaqëson vendin në samitin e gjashtë të Komunitetit Politik Evropian (EPC), që këtë vit po mbahet në Tiranë, Shqipëri. Ky samit mblodhi 45 liderë evropianë, përfshirë edhe përfaqësuesit më të lartë të institucioneve të Bashkimit Evropian.
E pritur zyrtarisht nga kryeministri shqiptar Edi Rama, Presidentja Osmani merr pjesë në të dy seancat kryesore të këtij samiti dhe ka një rol kyç në agjendë: ajo bashkëkryeson tryezën e liderëve me Kryeministrin e Kroacisë, Andrej Plenković, me temën “Një Evropë e hapur me kufij të sigurt”.
Kjo tryezë synon të adresojë sfidat e sigurisë në kontinent, çështjet e migrimit dhe lëvizshmërisë, me theks të veçantë në fuqizimin e rinisë dhe shfrytëzimin e potencialit të diasporës si faktor zhvillimi ekonomik dhe stabiliteti. Pjesëmarrës në këtë diskutim janë edhe liderë të rëndësishëm evropianë, përfshirë kryeministrat e Italisë, Austrisë, Hungarisë dhe Belgjikës.
Në kuadër të samitit, Presidentja Osmani do të zhvillojë gjithashtu takime bilaterale me liderë të tjerë evropianë për të thelluar bashkëpunimin dhe për të avancuar interesat e Republikës së Kosovës në arenën ndërkombëtare.
Komuniteti Politik Evropian, i krijuar në vitin 2022, përfaqëson një platformë gjithëpërfshirëse për diskutime strategjike mes vendeve të BE-së dhe atyre jashtë saj, me qëllim forcimin e bashkëpunimit politik, ekonomik dhe të sigurisë në Evropë.
