Kryeministri i Shqipërisë, Edi Rama, në një konferencë për shtyp me kryeministren e Danimarkës, Mette Frederiksen, pas përfundimit të Samitit të Komunitetit Politik Evropian (KPE) në Tiranë, theksoi rëndësinë strategjike të takimit dhe kontributin e tij në ndërtimin e një vizioni të përbashkët për të ardhmen e kontinentit evropian.
“U mblodhëm bashkë, anëtarë të BE-së dhe vende joanëtare, për të zhvilluar një diskutim të rëndësishëm, intensiv dhe të hapur mbi një Evropë të re në një botë të re – që ishte edhe titulli i këtij Samiti,” u shpreh Rama.
Kreu i qeverisë shqiptare vlerësoi se ky samit solli një “përkushtim të ripërtërirë ndaj parimeve dhe vlerave evropiane”, duke theksuar se mbrojtja e qytetarëve dhe investimi në të ardhmen janë prioritete që bashkojnë vendet, pavarësisht statusit të tyre në raport me BE-në.
Ai paralajmëroi edhe hapa konkretë për organizimin e mëtejshëm të Komunitetit Politik Evropian: “Vendosëm krijimin e një skuadre bashkërenduese të KPE-së, nën kujdesin e zyrës së Presidentit të Këshillit Evropian. Pati përfundime shumë interesante, të cilat do të çohen më tej nga pala daneze.”
Ekonomia në qendër të bashkëpunimit
Në fokus të deklaratës së Ramës ishte edhe potenciali ekonomik i përbashkët i vendeve evropiane: “Së bashku përfaqësojmë një treg 600 milionësh me një potencial masiv. Na takon ta shndërrojmë këtë potencial në rezultate pozitive për njerëzit tanë dhe për komunitetin e vendeve me mendësi të përbashkët,” tha ai, duke bërë thirrje për intensifikim të bashkëpunimit rajonal dhe evropian.
Samiti i Komunitetit Politik Evropian në Tiranë u konsiderua një platformë e rëndësishme për dialog të hapur mes vendeve të BE-së dhe atyre jashtë unionit, në një kohë sfidash globale dhe dinamike të reja gjeopolitike.
