Një aksident hekurudhor ka ndodhur sot në fshatin Çikatovë të Komunës së Drenasit, ku një tren është përplasur me një veturë. Ngjarja ka ndodhur para pak minutash dhe është konfirmuar përmes pamjeve të publikuara në rrjete sociale.
Sipas raportimeve fillestare, vetura ka pësuar dëme të konsiderueshme materiale, ndërsa autoritetet nuk kanë dhënë ende informacion zyrtar nëse ka persona të lënduar në këtë incident.
Policia dhe ekipet emergjente ndodhen në vendin e ngjarjes dhe po hetojnë rrethanat e aksidentit. Ende nuk dihet shkaku i përplasjes apo nëse janë respektuar rregullat e sigurisë hekurudhore dhe rrugore.
Ngjarja ka shkaktuar shqetësim te banorët e zonës, ndërsa pritet një komunikatë zyrtare nga institucionet përgjegjëse në orët në vijim.
Ndërkohë, autoritetet apelojnë për kujdes të shtuar në zonat ku rrugët ndërpriten me linjat hekurudhore, duke theksuar rëndësinë e respektimit të sinjalistikës për të shmangur incidente të tilla.
