Kryetari i Këshillit Kombëtar Shqiptar për Luginën e Preshevës, Enkel Rexhepi, ka reaguar me indinjatë pas dëmtimit të pllakatës përkujtimore kushtuar Komandant Lleshit në qytetin e Bujanocit.
Në një postim në rrjetin social Facebook, Rexhepi e cilësoi aktin si “të turpshëm, frikacak dhe thellësisht provokues ndaj ndjenjave të shqiptarëve të Luginës së Preshevës.”
“Ky është jo vetëm një sulm mbi kujtesën e një figure emblematike të rezistencës shqiptare, por një përpjekje e hapur për të provokuar tensione dhe për të fyer identitetin dhe historinë tonë kolektive,” – shkroi Rexhepi.
Sipas tij, akte të tilla nuk janë të rastësishme, por të organizuara dhe të motivuara nga urrejtja ndaj shqiptarëve. Ai nënvizoi rëndësinë e ruajtjes së kujtesës historike dhe simboleve të qëndresës kombëtare, duke e konsideruar Komandant Lleshin një figurë kyçe të sakrificës për liri.
“Askush nuk mund ta fshijë atë nga memorja e historisë sonë, sepse historia jonë ka ideal dhe qëndrueshmëri historike,” – shtoi më tej ai.
Rexhepi u shpreh se krenaria, kujtesa dhe identiteti shqiptar nuk mund të cenohen nga rrugaçë të dirigjuar nga urrejtja, duke përmendur specifikisht qytetet e Bujanocit, Preshevës dhe Medvegjës si vende të qëndresës shqiptare.
Ai e përmbylli reagimin me një mesazh të qartë:
“Lavdi Komandant Lleshit dhe të gjithë atyre që ranë për liri!”
