Një operacion i përbashkët i përmasave të mëdha është zhvilluar që në orët e para të mëngjesit në Shqipëri dhe Itali, në kuadër të luftës kundër trafikut ndërkombëtar të drogës, pastrimit të parave dhe shpërdorimit të detyrës.
Në këtë aksion janë angazhuar Drejtoria e Hetimit Antimafia e Barit dhe autoritetet shqiptare, ndërsa operacioni në territorin shqiptar po ekzekutohet me urdhër të Prokurorisë së Posaçme (SPAK).
Sipas mediave italiane, janë lëshuar 52 urdhër-arreste për persona të dyshuar për përfshirje në veprimtari kriminale, duke përfshirë trafik droge, pastrim parash dhe shpërdorim të detyrës zyrtare. Gjithashtu, janë sekuestruar pasuri të konsiderueshme të luajtshme dhe të paluajtshme në të dy vendet, me vlerë prej disa milionë eurosh.
Operacioni synon goditjen e rrjeteve kriminale shqiptare që dyshohet se kanë ngritur një sistem të mirëorganizuar trafiku të heroinës dhe kokainës, duke e shpërndarë atë nga Ballkani drejt Evropës Veriore dhe rajonit të Puglias në Itali.
Autoritetet kanë paralajmëruar se hetimet janë ende në vijim dhe priten zhvillime të tjera, ndërsa ky aksion konsiderohet një prej më të mëdhenjve të viteve të fundit në luftën kundër krimit të organizuar me bazë në Shqipëri.
