Drejtori i Përgjithshëm i Policisë së Kosovës, kolonel Gazmend Hoxha, priti sot në takim të ngarkuarën me punë në Ambasadën e Shteteve të Bashkuara të Amerikës në Kosovë, znj. Anu Prattipati.
Takimi u mbajt në ambientet e Drejtorisë së Përgjithshme të Policisë së Kosovës dhe shërbeu si platformë për diskutimin e çështjeve kyçe që lidhen me sigurinë e përgjithshme në vend, përfshirë sfidat aktuale dhe objektivat strategjike të Policisë së Kosovës.
Gjatë bashkëbisedimit, drejtori Hoxha theksoi përkushtimin e institucionit që ai udhëheq për të vepruar si një polici profesionale dhe e besueshme, në funksion të ruajtjes së rendit kushtetues dhe garantimit të sigurisë për të gjithë qytetarët e Republikës së Kosovës.
Të dy palët nënvizuan rëndësinë e vazhdimit të bashkëpunimit të ngushtë dhe koordinimit ndërinstitucional, si një faktor thelbësor për përballjen me sfidat e sigurisë dhe forcimin e besimit të qytetarëve në institucionet ligjzbatuese.
Në fund të takimit, drejtori Hoxha shprehu gatishmërinë për të thelluar më tej bashkëpunimin me Ambasadën e SHBA-së, veçanërisht në fushat me interes të përbashkët që kontribuojnë në paqen dhe sigurinë publike në Kosovë.
