Presidentja e Republikës së Kosovës, Vjosa Osmani, ka nisur një vizitë shtetërore në Zvicër, ku është pritur nga Presidentja zvicerane Karin Keller-Sutter në rezidencën zyrtare të Këshillit Federal.
Në një deklaratë pas takimit, Presidentja Osmani falënderoi homologen zvicerane për mikpritjen dhe vlerësoi lart marrëdhëniet mes dy vendeve.
“Faleminderit për mikpritjen, miqësinë dhe nderimin, Presidente Keller-Sutter. Kjo vizitë e parë shtetërore në Zvicër që po fillon në rezidencën zyrtare të Këshillit Federal të Zvicrës është dëshmi se bashkë po shkruajmë kapitullin e ri të historisë së partneritetit midis shteteve dhe popujve tanë,” u shpreh Osmani.
Vizita e Presidentes Osmani në Zvicër po zhvillohet në një klimë të thellimit të bashkëpunimit bilateral dhe forcimit të lidhjeve institucionale mes dy shteteve.
Në agjendën e saj zyrtare përfshihet edhe pjesëmarrja në një aktivitet të veçantë në Gjenevë, kushtuar trashëgimisë politike të ish-presidentit finlandez dhe ndërmjetësuesit të paqes, Martti Ahtisaari. Aktiviteti organizohet nga Fondacioni i Paqes Martti Ahtisaari, në bashkëpunim me Misionin e Përhershëm të Finlandës në Gjenevë, organizatën Interpeace, dhe Geneva Graduate Institute.
Po ashtu, gjatë qëndrimit në Gjenevë, Presidentja Osmani pritet të zhvillojë edhe një takim me mërgatën shqiptare në Zvicër, ku do të diskutojë për rolin e tyre në forcimin e lidhjeve mes Kosovës dhe diasporës.
