Përfaqësuesja e lartë e Bashkimit Evropian për Politikë të Jashtme dhe Siguri, Kaja Kallas, ka theksuar rëndësinë e rifillimit të dialogut ndërmjet Kosovës dhe Serbisë, duke e quajtur atë një domosdoshmëri për përparimin e të dyja vendeve drejt integrimit evropian.
Deklarata e saj erdhi në kuadër të një vizite zyrtare në Ballkanin Perëndimor, që përfshin Serbinë, Kosovën dhe Maqedoninë e Veriut. Kallas qëndroi të mërkurën në Beograd, ndërsa sot (e enjte) viziton Prishtinën, për të vijuar më pas udhëtimin në Shkup.
Në një postim në rrjetin social X (ish-Twitter), Kallas u shpreh:
“Do të vizitoj Serbinë, Kosovën dhe Maqedoninë e Veriut në dy ditët e ardhshme dhe do të angazhohem me qeveritë dhe shoqërinë civile në rrugën e tyre drejt BE-së. Dialogu Beograd–Prishtinë është një domosdoshmëri për të ecur përpara. Tani është koha për t’u riangazhuar.”
Vizita e Kallas vjen në një kohë kur procesi i dialogut është në një fazë stagnimi, ndërsa BE-ja kërkon riaktivizimin e bisedimeve dhe zbatimin e marrëveshjeve ekzistuese, si parakusht për përparim të mëtejshëm në procesin e anëtarësimit.
