Kryeministri në detyrë i Republikës së Kosovës, Albin Kurti, ka zhvilluar mbrëmë një darkë pune me Përfaqësuesen e Lartë të Bashkimit Evropian për Punë të Jashtme dhe Politikë të Sigurisë, Kaja Kallas, e cila po qëndron për vizitë zyrtare në Prishtinë.
Në këtë takim të nivelit të lartë, Kryeministri Kurti e uroi znj. Kallas për vizitën dhe e falënderoi për mbështetjen e vazhdueshme të BE-së ndaj Kosovës. Gjatë bisedës, palët diskutuan për marrëdhëniet ndërmjet Kosovës dhe Bashkimit Evropian, agjendën evropiane të reformave dhe Planin e Rritjes për Ballkanin Perëndimor.
Kurti: Kosova meriton statusin e kandidatit për anëtarësim në BE
Kryeministri theksoi përkushtimin e Kosovës në linjëzimin e politikës së jashtme me atë të BE-së, duke nënvizuar edhe progresin e brendshëm të vendit në fusha kyçe të reformës, i cili, sipas tij, është reflektuar qartë edhe në raportet e institucioneve evropiane.
Në këtë kontekst, Kurti falënderoi përfaqësuesen Kallas për nismën e BE-së për largimin gradual të masave kufizuese ndaj Kosovës, por kërkoi që këto masa të hiqen plotësisht. Ai shtoi se Kosova, si demokracia më e avancuar në Ballkanin Perëndimor, duhet të marrë statusin e vendit kandidat për BE.
Diskutim për situatën paszgjedhore dhe institucionet e reja
Gjatë darkës, u trajtua edhe situata politike pas zgjedhjeve të fundit dhe angazhimet për formimin e institucioneve të legjislaturës së nëntë. Kryeministri theksoi rëndësinë e një tranzicioni të qetë institucional dhe të fokusuar në stabilitet demokratik.
Dialogu me Serbinë dhe llogaridhënia për sulmin në Banjskë
Në lidhje me procesin e dialogut të ndërmjetësuar nga BE, Kurti kërkoi zbatim të plotë të Marrëveshjes Bazike dhe Aneksit të saj, ndërkohë që theksoi se Serbia duhet të mbahet përgjegjëse për sulmin terrorist dhe paramilitar në Banjskë. Ai kujtoi se lideri i grupit sulmues, Millan Radoiçiq, është tashmë nën aktakuzë me 160 faqe nga Prokuroria e Kosovës, dhe kërkoi dorëzimin e tij autoriteteve kosovare.
Çështja e Luginës së Preshevës në fokus
Kurti ngriti gjithashtu çështjen e shkeljeve të të drejtave të shqiptarëve në Preshevë, Medvegjë dhe Bujanoc, duke kërkuar angazhim konkret të BE-së për mbrojtjen e të drejtave të shqiptarëve në Luginë, si pjesë e qasjes gjithëpërfshirëse ndaj të drejtave të njeriut dhe stabilitetit në rajon.
