Tre zyrtarë të lartë janë arrestuar në Korenë e Veriut pas një incidenti të ndodhur gjatë lëshimit në det të një anijeje të re luftarake 5,000 tonëshe, bëjnë të ditur mediat shtetërore të këtij vendi. Incidenti ka ndodhur të mërkurën, gjatë një ceremonie zyrtare në kantierin detar të Chongjin, në veri të vendit.
Sipas raportimeve, gjatë momentit të zbritjes në ujë, anija pësoi dëmtime serioze në disa pjesë të saj dhe humbi ekuilibrin, çka e ka nxjerrë jashtë funksionit të plotë. Agjencia zyrtare e lajmeve KCNA e përshkroi incidentin si “akt kriminal”, duke cituar liderin Kim Jong Un, i cili ka urdhëruar nisjen e një hetimi të thelluar.
Personat e arrestuar janë inxhinieri kryesor i kantierit detar, kreu i ndërtimit dhe një menaxher administrativ. Ata janë shpallur “përgjegjës kryesorë për aksidentin” dhe janë në mbajtje të autoriteteve për hetime të mëtejshme. Të premten, agjencia KCNA raportoi se një nga të arrestuarit, menaxheri i kantierit Hong Kil Ho, është marrë në pyetje nga forcat e rendit.
Pamjet satelitore nga zona e ngjarjes treguan anijen e mbuluar me një mbulesë të kaltër dhe një pjesë të saj të dalë në tokë, duke konfirmuar dëmet strukturore. Ndërkohë, mediat shtetërore nuk raportuan për viktima apo të lënduar, duke minimizuar rëndësinë e dëmit.
Ky incident vjen në një kohë kur Koreja e Veriut është duke investuar në mënyrë intensive në kapacitetet e saj detare dhe ushtarake, ndërsa kontrolli i brendshëm mbi sektorët strategjikë mbetet jashtëzakonisht i rreptë. Hetimet për ngjarjen pritet të vazhdojnë në ditët në vijim.
