Në Gjykatën Themelore të Prishtinës ka nisur seanca e shqyrtimit fillestar ndaj Blerim Avdiut, i akuzuar për kanosjen e ministrit në dorëheqje të Bujqësisë, Pylltarisë dhe Zhvillimit Rural, Faton Peci.
Avdiu në seancë ka pranuar fajin dhe ka kërkuar falje publike për veprimet e tij, mirëpo sipas raportimeve të T7, ministri Peci nuk e ka pranuar kërkimfaljen.
Sipas aktakuzës së ngritur më 26 mars 2025 nga Prokuroria Themelore në Prishtinë, Avdiu akuzohet se më 2 mars 2025 ka bërë kërcënime serioze ndaj Pecit përmes rrjeteve sociale. Ai thuhet se ka reaguar pas publikimit të një fotografie nga Peci në “Facebook” që lidhej me angazhimet e tij si ministër, duke e kanosur publikisht përmes mesazheve fyese dhe kërcënuese.
Në aktakuzë përfshihen fjalët kërcënuese të Avdiut, të cilat përmbajnë gjuhë të ashpër dhe kërcënime për jetën e ministrit. Mesazhet, sipas prokurorisë, përmbajnë shprehje të rënda si:
“Si kryeminel ti q… edhe ata të vdekurit, une kam me të vra jo tjetër kush… mos harro me 28 maj jam në kufi veç me ardh me të vra…”, duke krijuar te i dëmtuari ndjenjën e frikës dhe ankthit për jetën.
Prokuroria thekson se këto deklarata të të akuzuarit janë bërë me dashje dhe kanë pasur për qëllim frikësimin e ministrit Peci.
Seanca e radhës pritet të përcaktojë hapat e mëtejmë të procedurës gjyqësore, ndërkohë që rasti ka ngjallur reagime të shumta publike dhe politike.
