Partia Demokratike e Kosovës ka ngritur akuza të rënda ndaj Ministrisë së Bujqësisë dhe ministrit Faton Peci, duke e cilësuar si një “skandal milionësh” marrëveshjen për dhënien me qira të një impianti publik për përpunimin e mbetjeve shtazore.
Në një konferencë për media, anëtari i Kryesisë së PDK-së, Naim Ismajli, deklaroi se ministri Peci ka shkelur Ligjin për Pronën Publike duke i dhënë me qira për 20 vjet impiantin e mbetjeve shtazore kompanisë “LIP KS & IT SH.P.K”, pa ndonjë ankand publik. Ai theksoi se marrëveshja është nënshkruar me miratimin e kryeministrit Albin Kurti dhe se përbën një dëm të rëndë për interesin publik.
Sipas Ismajlit, prona publike me vlerë mbi 10 milionë euro është dhënë për një çmim qesharak prej vetëm 30 mijë euro në vit, ndërsa kompania përfituese do të përfitojë gjithashtu subvencione vjetore mbi 3.2 milionë euro – një shifër që për 20 vite arrin në 64 milionë euro nga buxheti i shtetit.
“Kompania është regjistruar vetëm pesë ditë pas shpalljes dhe nuk i përmbush as kriteret ligjore të përvojës teknike dhe financiare. Pronari i saj rezulton të jetë i lidhur me tri kompani të tjera pa asnjë përvojë në përpunimin e mbetjeve shtazore. Me këtë marrëveshje, ajo është shpërblyer me një impiant modern, gjashtë kamionë, gjeneratorë, cisterna gazi dhe subvencionim të garantuar për dy dekada, pa konkurrencë,” tha Ismajli.
Ai akuzoi Ministrinë e Bujqësisë për shkelje të hapur të Udhëzimit Administrativ nr. 04/2025 dhe Rregullores (QRK) Nr. 03/2025, të cilat kërkojnë transparencë, ankand publik, përshkrim të qartë të pronës dhe kritere të përcaktuara për pjesëmarrësit.
“Ky është një rast tjetër flagrant ku Qeveria Kurti, në vend që të mbrojë interesin publik, po e përdor pasurinë publike për të favorizuar një pakicë të privilegjuar,” përfundoi Ismajli.
Deri në momentin e publikimit të këtij lajmi, Ministria e Bujqësisë nuk ka dhënë ndonjë reagim zyrtar lidhur me akuzat.
