Kryeministri në detyrë i Kosovës, Albin Kurti, ka hedhur akuza drejt opozitës për pengimin e konstituimit të Kuvendit të Kosovës, duke e cilësuar situatën si një bllokadë të qëllimshme politike.
Në një prononcim për media pas pjesëmarrjes në edicionin e 16-të të Konferencës vjetore shkencore “Java e Albanologjisë”, të mbajtur në Institutin Albanologjik të Prishtinës, Kurti u shpreh i vendosur në mbështetjen ndaj kandidates së Vetëvendosjes për kryetare të Kuvendit, Albulena Haxhiu. Ai theksoi se emri i Haxhiut nuk është në diskutim dhe se opozita po bllokon procesin përmes refuzimit të pjesëmarrjes në votimin e fshehtë.
“Albulena Haxhiu nuk është as në pyetje, as në pikëpyetje. E, përgjigja është votimi i fshehtë për çfarë opozita padrejtësisht dhe me dëm për shtetin e Kosovës po e pamundëson kuorumin”, tha Kurti.
Sipas tij, refuzimi i opozitës për të siguruar kuorumin e nevojshëm për zgjedhjen e kryetares së Kuvendit është një veprim që dëmton jo vetëm funksionimin institucional, por edhe interesin shtetëror.
Procesi i moskonstituimit të Kuvendit ka krijuar një ngërç politik që po zgjat prej disa javësh, me pasojë vonimin në formimin e institucioneve të reja pas zgjedhjeve të fundit. Pavarësisht thirrjeve për dialog dhe bashkëpunim institucional, palët politike vazhdojnë të mbeten të pozicionuara në qëndrime të kundërta.
Opozita nuk ka komentuar ende deklaratat e fundit të Kurtit.
