Real Madrid ka konfirmuar zyrtarisht emërimin e Xabi Alonso-s si trajnerin e ri të ekipit të parë, duke i dhënë fund muajve të spekulimeve mbi të ardhmen e pankinës pas largimit të Carlo Ancelotti-t.
Lajmi u bë i ditur sot nga presidenti i klubit, Florentino Perez, në një prezantim zyrtar para mediave, ku u theksua se Alonso do të drejtojë “Los Blancos” për një periudhë trevjeçare, deri në verën e vitit 2028.
Vendimi për të besuar Alonso-n është konsideruar si fillimi i një epoke të re për madrilenët. Ish-mesfushori i famshëm spanjoll, që ka luajtur me sukses për Realin në vitet 2009–2014, vjen me një profil të admiruar: përvojë ndërkombëtare si futbollist, sukses si trajner në Bundesligë me Bayer Leverkusen dhe një lidhje e fortë emocionale me klubin.
Në një video të publikuar nga klubi në rrjetet sociale, Alonso shfaqet për herë të parë si trajner i Real Madridit, duke shprehur entuziazmin e tij:
“Përshëndetje madridista. Tashmë jam këtu, shumë i kënaqur për të nisur këtë etapë të re me shumë emocione dhe energji. Ju dërgoj një përshëndetje. Hala Madrid!”
Ky emërim vjen në një moment kyç për klubin, që synon të ndërtojë një projekt të qëndrueshëm afatgjatë dhe të ruajë dominimin në futbollin evropian.
Tifozët dhe analistët tashmë po presin me padurim hapat e parë të Alonso-s në krye të një skuadre plot yje dhe ambicie të mëdha.
