Organizata Botërore e Shëndetësisë ka ngritur alarmin lidhur me pamundësinë për të dërguar ndihma mjekësore në Rripin e Gazës, pavarësisht rifillimit të kufizuar të qasjes humanitare në territorin palestinez pas më shumë se dy muajsh bllokade totale nga Izraeli.
Gjatë një konference për media të mbajtur të hënën në Gjenevë, drejtoresha rajonale e OBSH-së për Mesdheun Lindor, Hanan Balkhy, shprehu shqetësimin e thellë për krizën shëndetësore në Gaza. Ajo tha se, që nga përfundimi i bllokadës, asnjë nga kamionët e OBSH-së me ndihma shëndetësore nuk është lejuar të hyjë në territorin e rrethuar.
“Situata është shkatërruese. Jemi thellësisht të shqetësuar për pasojat e kësaj – jo vetëm për momentin aktual, por edhe për brezat që do të vijnë,” deklaroi Balkhy. Sipas saj, 51 kamionë të OBSH-së me furnizime jetike mjekësore ndodhen ende në pritje për të kaluar kufirin.
Edhe pse rreth 400 kamionë kanë marrë leje për të hyrë në Gazë, furnizime nga vetëm 115 prej tyre kanë arritur të kalojnë – dhe asnjë në veri të territorit, që ndodhet nën rrethim të plotë. OBSH konfirmon se asnjë nga këta kamionë nuk ka qenë i saj.
Drejtori për emergjenca i rajonit të OBSH-së, Ahmed Zouiten, shprehu shpresën se hyrja e ndihmave do të realizohet së shpejti, por pranoi se ende është “shumë herët për të ditur” nëse dhe kur do të lejohet hyrja e tyre.
Kriza humanitare në Gaza është përkeqësuar ndjeshëm që nga rifillimi i ofensivës së Izraelit kundër Hamasit në mars, një fushatë ushtarake që ka marrë kritika të ashpra nga bashkësia ndërkombëtare. Ndërkohë, udhëheqës evropianë dhe arabë janë mbledhur në Spanjë duke kërkuar përfundimin e një lufte që e kanë cilësuar “çnjerëzore” dhe “pa kuptim”.
Sipas të dhënave të fundit të Ministrisë së Shëndetësisë në Gaza, që kontrollohet nga Hamasi, të paktën 3.822 persona janë vrarë që nga rënia e armëpushimit më 18 mars, duke e çuar numrin total të viktimave të luftës në 53.977 – shumica dërrmuese civilë.
Konflikti nisi pas sulmit të përgjakshëm të Hamasit ndaj Izraelit në tetor 2023, ku humbën jetën mbi 1.200 persona dhe u morën peng 251 të tjerë, prej të cilëve 57 mbeten ende në Gaza. Izraeli e ka shpallur Hamasin organizatë terroriste, një qëndrim i ndarë edhe nga SHBA dhe BE.
