Ministri në detyrë i Bujqësisë, Faton Peci, është duke u intervistuar nga Prokuroria Speciale e Kosovës, në kuadër të hetimeve që lidhen me dyshimet për keqpërdorim të detyrës zyrtare dhe menaxhim të parregullt të fondeve publike. Lajmin e ka konfirmuar zëdhënësja e Prokurorisë Speciale, Arbnora Luta.
Hetimet pasojnë një aksion të zhvilluar më herët gjatë ditës nga Policia e Kosovës në objektin e Ministrisë së Bujqësisë, ku u kryen bastisje lidhur me projektin për një fabrikë për përpunimin e mbetjeve shtazore.
Sipas zëdhënësit të Policisë së Kosovës, Baki Kelani, bastisjet janë kryer me kërkesë të Prokurorisë Speciale dhe mbi bazën e një urdhërese të Gjykatës kompetente.
“Policia e Kosovës me njësitë e saja relevante, me kërkesë të Prokurorisë Speciale, bazuar në urdhëresën e Gjykatës kompetente ka filluar zbatimin e një urdhërkontrolli në Prishtinë, mbi dyshimet për keqpërdorim të detyrës zyrtare,” deklaroi Kelani.
Gjatë bastisjeve, autoritetet kanë konfiskuar një sasi të konsiderueshme dokumentesh që pritet të analizohen në funksion të mbledhjes së provave për procedurat e dyshuara të keqpërdorimit të fondeve.
Hetimet janë pjesë e përpjekjeve të institucioneve të drejtësisë për të adresuar shkeljet eventuale në përdorimin e buxhetit publik dhe sigurimin e transparencës në menaxhimin e projekteve shtetërore.
