Më 28 maj 2025, në ora 14:00, do të nisë zyrtarisht zbatimi i parimit të kontrollit të përbashkët “Hyrje – Hyrje” në pikën kufitare Glloboqicë – Jazhincë, që lidh Kosovën me Maqedoninë e Veriut.
Lajmi është bërë i ditur përmes një njoftimi zyrtar për media, ku theksohet se në ceremoninë e inaugurimit do të marrin pjesë figura të larta shtetërore nga të dy vendet. Në mesin e të pranishmëve priten: ministri në detyrë i Punëve të Brendshme të Kosovës, Xhelal Sveçla, zëvendëskryeministri i parë i Maqedonisë së Veriut, Izet Mexhiti, dhe ministri i Brendshëm i Maqedonisë së Veriut, Pançe Toshkovski, së bashku me delegacione zyrtare.
Ky projekt përfaqëson një hap të rëndësishëm drejt thellimit të bashkëpunimit ndërkufitar dhe është pjesë e zbatimit të Protokollit të Implementimit të Marrëveshjes për Kontroll të Përbashkët, të nënshkruar në nëntor të vitit 2024 gjatë mbledhjes së përbashkët të dy qeverive.
Pika kufitare Glloboqicë – Jazhincë është një nga dy kalimet ku do të aplikohet ky model, së bashku me pikën kufitare Hani i Elezit – Bllacë.
Zbatimi i kontrollit të përbashkët pritet të përmirësojë ndjeshëm përvojën e qytetarëve dhe transportit ndërkufitar përmes:
-
lehtësimit të lëvizjes së njerëzve dhe mallrave,
-
shkurtesës së kohës së pritjes në kufi,
-
si dhe rritjes së bashkëpunimit në fushën e sigurisë dhe menaxhimit kufitar.
Ky hap konsiderohet një model i mirë i integrimit rajonal dhe përputhshmërisë me standardet evropiane të kontrollit kufitar.
