Kosova do të përballet të mërkurën me një mot të ndryshueshëm, ku vranësirat dhe intervalet me diell do të jenë dominuese. Sipas parashikimeve, në disa zona pritet të ketë reshje të dobëta lokale, përfshirë rigë apo rrebeshe të shkurtra shiu.
Edhe pse temperaturat do të shënojnë një rritje të lehtë krahasuar me ditët paraprake, moti do të mbetet relativisht i freskët për këtë periudhë të vitit – sidomos në zonat ku vranësirat do të jenë më të theksuara. Vlerat maksimale të temperaturës pritet të arrijnë deri në 23 apo 24 gradë Celsius.
Ndërkohë, një situatë e ngjashme meteorologjike do të mbizotërojë edhe në rajon. Në Shqipëri, Maqedoninë e Veriut, Luginën e Preshevës dhe Mal të Zi, dita e mërkurë do të karakterizohet nga mot me diell i ndërthurur me vranësira. Në disa zona ekziston mundësia për zhvillime të izoluara të rrebesheve shoqëruar me vetëtima dhe bubullima.
Temperaturat në këto vende gjithashtu do të pësojnë rritje të lehta, duke krijuar kushte më të favorshme për aktivitete të jashtme, por me kujdes ndaj ndonjë rrebesh të papritur.
