Organizata e Veteranëve të Luftës së Ushtrisë Çlirimtare të Kosovës (OVL-UÇK) ka reaguar ashpër ndaj një deklarate të bërë së fundi nga kryetarja e Gjykatës Speciale, Ekaterina Trendafilova, e cila kishte thënë se selia e kësaj gjykate nuk mund të vendoset në Kosovë për shkak të rrezikshmërisë për dëshmitarët.
Në një reagim zyrtar, OVL-UÇK e ka cilësuar këtë deklaratë si “të pavërtetë dhe të pabazuar”, duke theksuar se një pretendim i tillë bie ndesh me faktet dhe realitetin e pasluftës në Kosovë.
“Që nga viti 1999 e këndej, në Kosovë janë zhvilluar dhjetëra procese gjyqësore ndaj ish-pjesëtarëve të UÇK-së, të udhëhequra nga UNMIK-u, EULEX-i dhe gjykatat vendore. As në një rast të vetëm nuk është dëshmuar ndonjë frikësim sistematik i dëshmitarëve, e aq më pak ndonjë rrezik për jetën e tyre,” thuhet në reagim.
Sipas OVL-UÇK-së, këto procese kanë përfshirë hetime, arrestime dhe dënime konkrete, madje edhe në periudha jashtëzakonisht të ndjeshme menjëherë pas përfundimit të luftës, kur klima emocionale dhe sociale ishte shumë më e tensionuar sesa sot.
“Kjo dëshmon qartë se në Kosovë ka ekzistuar hapësirë dhe kushte për zhvillimin e gjykimeve të drejta dhe të sigurta,” përfundon reagimi, duke kundërshtuar idenë se drejtësia ndaj UÇK-së mund të realizohet vetëm jashtë vendit.
Deklarata e Trendafilovës ka nxitur reagime të shumta në opinionin publik dhe pritet të jetë pjesë e diskutimeve të vazhdueshme për transparencën dhe drejtësinë ndërkombëtare në raport me luftën e fundit në Kosovë.
