Kryeqyteti do të përballet nesër me bllokim të disa prej hyrjeve kryesore si pasojë e një proteste të paralajmëruar nga Oda Ekonomike e Kosovës, e cila kundërshton liberalizimin e tregut të energjisë elektrike që pritet të hyjë në fuqi më 1 qershor 2025.
Protesta është e planifikuar të mbahet të enjten, më 29 maj 2025, nga ora 10:00 deri në 12:00, dhe do të shoqërohet me ndalim të përkohshëm të qarkullimit në disa prej akseve më të rëndësishme hyrëse në Prishtinë.
Sipas njoftimit zyrtar, zonat që do të preken nga bllokimi përfshijnë:
-
Hyrja nga Veterniku dhe Gjilani – përfshirë rrugën pranë Albi Mall dhe pjesën poshtë Veternikut, duke përfshirë edhe qasjet nga Ferizaj, Gjilan dhe Aeroporti i Prishtinës.
-
Hyrja nga Fushë-Kosova dhe Mitrovica – konkretisht rrethrrotullimi te Lakrishtja (afër Dukagjini Tower).
-
Hyrja nga Podujeva – në lagjen Vranjevc, përfshirë zonën te ish-Humanisti dhe udhëkryqin pranë bankës Raiffeisen, duke ndaluar qasjen në drejtim të Podujevës dhe nga Dragodani në drejtim të Shkabaj/Orlloviqit.
Automjetet e bizneseve që do të marrin pjesë në protestë do të pozicionohen në rrugë, duke pamundësuar përkohësisht qarkullimin e lirë në këto segmente.
Autoritetet e Kryeqytetit kanë bërë thirrje për mirëkuptim nga qytetarët, duke i inkurajuar ata të planifikojnë rrugë alternative gjatë kohës së protestës. Gjithashtu është bërë e ditur se institucionet janë në komunikim të vazhdueshëm me organet kompetente për të garantuar sigurinë publike dhe menaxhimin efikas të situatës.
Protesta është paralajmëruar si shenjë pakënaqësie ndaj reformave në sektorin e energjisë, të cilat po cilësohen nga komuniteti i biznesit si të dëmshme për funksionimin ekonomik të vendit.
