Një rrjet kriminal që trafikonin armë zjarri nga Kosova drejt Shqipërisë është goditur nga Policia e Tiranës në një operacion të mirëkoordinuar me Prokurorinë dhe Forcën Operacionale. Si rezultat i hetimeve pesëmujore u arrestuan 10 persona, ndërsa dy të tjerë janë shpallur në kërkim.
Operacioni policor, i koduar “Puzzle”, u zhvillua nga Seksioni për Hetimin e Trafiqeve të Paligjshme në bashkëpunim me Forcën Operacionale të DVP Tiranë dhe nën drejtimin e Prokurorisë së Tiranës.
Bilanci i operacionit:
-
10 persona të arrestuar
-
2 persona të shpallur në kërkim
-
14 armë zjarri të sekuestruara (12 pistoleta, njëra me silenciator, dhe 2 automatikë)
-
Krehra dhe municion luftarak
-
2077 fara cannabisi
-
3 automjete
-
8 telefona celularë
Identiteti i të arrestuarve:
Në pranga kanë rënë shtetasit:
E.T. (32 vjeç), L.H. (21), F.B. (26), R.H. (21), V.M. (23), K.F. (18), G.M. (22), A.Sh. (23), si dhe A.P. dhe K.P., të ndaluar më herët më 1 prill 2025, teksa u kapën në flagrancë me 2 armë zjarri të dyshuara të trafikuara nga Kosova.
Ndërkohë janë shpallur në kërkim R.K. (41) dhe A.N. (24).
Skema e trafikimit
Sipas hetimeve, rrjeti kriminal sigurohej me armë zjarri kryesisht në Kosovë dhe më pas i transportonte ato në Tiranë, ku përgatiteshin për shitje në tregun e zi. Operacioni u bazua në informacione të siguruara përmes metodave proaktive të hetimit, të cilat konfirmuan aktivitetin kriminal të grupit.
Gjatë kontrollit në banesën e njërit prej të arrestuarve, shtetasit K.F., u gjetën dhe sekuestruan 2077 fara cannabisi, të cilat dyshohet se ishin përgatitur për kultivim të paligjshëm.
Bashkëpunim me autoritetet kosovare
Policia e Tiranës, nën drejtimin e Prokurorisë, ka theksuar se është në bashkëpunim intensiv me autoritetet policore në Kosovë për të identifikuar dhe arrestuar persona të tjerë të përfshirë në rrjetin e trafikimit të armëve.
Materialet procedurale janë dorëzuar pranë Prokurorisë së Gjykatës së Shkallës së Parë të Juridiksionit të Përgjithshëm Tiranë, ndërsa hetimet vazhdojnë për zbardhjen e plotë të veprimtarisë kriminale.
