Organizata e Veteranëve të Luftës së Ushtrisë Çlirimtare të Kosovës (OVL UÇK), dega në Ferizaj, ka reaguar ashpër për dëmtimin dhe djegien e bunkerit në Pikën 6 në Jezerc, gjatë natës së kaluar.
Në një deklaratë zyrtare, OVL UÇK – Ferizaj shpreh shqetësimin dhe indinjatën e thellë për këtë veprim që e cilëson si “të ulët dhe të turpshëm”, duke theksuar se kjo është një fyerje ndaj kujtesës dhe sakrificës së dëshmorëve dhe luftëtarëve të Ushtrisë Çlirimtare të Kosovës.
Bunkeri në Pikën 6 përfaqëson simbolin e qëndresës dhe rezistencës së popullit kosovar gjatë luftës çlirimtare, dhe çdo sulm ndaj tij është një goditje ndaj trashëgimisë kombëtare.
Organizata ka njoftuar Policinë e Kosovës për këtë rast dhe ka kërkuar që autorët e këtij akti të rëndë të identifikohen dhe të përballen me drejtësinë sa më shpejt.
Pika 6, pjesë e Parkut Memorial të Ushtrisë Çlirimtare të Kosovës në Jezerc, konsiderohet një vlerë historike që kujton luftën e lavdishme të popullit tonë.
Në përfundim, OVL UÇK – Ferizaj thekson se do të mbetet e vendosur në ruajtjen dhe mbrojtjen e kujtimit të luftës çlirimtare dhe u bën thirrje institucioneve për veprime të shpejta në këtë çështje.
