Zëvendëskryeministri i parë në detyrë i Republikës së Kosovës, Besnik Bislimi, zhvilloi një takim bilateral me Përfaqësuesin e Posaçëm të Bashkimit Evropian për dialogun Kosovë–Serbi, Peter Sørensen, në selinë e BE-së në Bruksel.
Ky ishte takimi i parë zyrtar mes Bislimit dhe Sørensenit që nga emërimi i këtij të fundit si përfaqësues i BE-së në kuadër të dialogut Kosovë–Serbi.
Diskutime për çështje të hapura dhe sfida urgjente në procesin e dialogut
Pas takimit, zëvendëskryeministri Bislimi deklaroi për mediat se në fokus të bisedimeve ishin temat e pazgjidhura në kuadër të dialogut, për të cilat Kosova kërkon përgjigje konkrete dhe angazhim të drejtpërdrejtë nga Brukseli.
“Diskutuam për qasjen që z. Sørensen do të ketë në fazat e ardhshme të dialogut, si në nivel të kryenegociatorëve, ashtu edhe në takimet e larta që udhëhiqen nga zonja Kaja Kallas,” – theksoi Bislimi.
Ai veçoi disa çështje të rëndësishme të ngritura në takim:
-
Mungesat në zbatimin e marrëveshjes për menaxhimin e integruar të kufirit, përfshirë mosndërtimin e pikave kufitare nga Serbia dhe mosreagimin ndaj propozimeve të Kosovës për hapjen e pikave sezonale në Dobrosin, Muhovc dhe Breznicë.
-
Pengesat në njohjen e certifikatave fitosanitare dhe veterinare nga Serbia, që po dëmtojnë tregtinë dhe qarkullimin ndërkufitar.
-
Kostot që po i shkaktohen Kosovës nga mosfunksionalizimi i linjave të interkoneksionit energjetik me Serbinë, si pasojë e mospërmbushjes së marrëveshjes për energjinë nga pala serbe.
-
Bllokimi i ndihmave financiare për fermerët shqiptarë në Luginën e Preshevës, përmes bllokimit të llogarive bankare të Këshillit Kombëtar Shqiptar nga autoritetet serbe.
-
Fushata dezinformuese e Serbisë, e cila synon ndikimin negativ tek partnerët ndërkombëtarë dhe rritjen e presionit ndaj komunitetit serb në Kosovë.
Trilaterali u anulua për shkak të problemeve me delegacionin serb
Bislimi konfirmoi se ishte planifikuar edhe një takim trilateral me pjesëmarrjen e delegacionit serb, por ai u anulua për shkak të vonesave të ekipit të Serbisë, i cili nuk arriti në Bruksel për shkak të problemeve logjistike në Vjenë.
Dialogu dhe vakumi institucional në Prishtinë
I pyetur nëse vakumi institucional në Kosovë mund të ndikojë në vazhdimësinë e procesit të dialogut, zëvendëskryeministri Bislimi u shpreh se ndonëse pengesat ekzistojnë, Kosova nuk duhet të humbasë rastet kur mund të avancojë interesat e saj përmes një qasjeje konstruktive, pavarësisht sfidave të brendshme.
“Është e vërtetë që mungesa e institucioneve funksionale e bën të pamundur organizimin e takimeve të nivelit të lartë, por ekzistojnë fusha ku mund të ketë progres, nëse Serbia tregon vullnet politik,” – deklaroi ai.
