Komisionerja e Bashkimit Evropian për Zgjerimin, Marta Kos, ka dhënë një sinjal të fortë pozitiv lidhur me rrugëtimin e Shqipërisë drejt anëtarësimit në BE, duke shprehur bindjen se vendi mund të bëhet anëtar me të drejta të plota brenda dekadës.
Gjatë një fjalimi të mbajtur më 30 maj në Konferencën për Qendrën për Studime Evropiane në Bruksel, Kos vlerësoi progresin e Shqipërisë në kuadër të procesit të negociatave dhe ritmin e reformave që po ndërmerren.
“Ne kemi një mundësi reale për të pranuar një ose më shumë vende kandidate me të drejta të plota në BE deri në vitin 2029. Shqipëria ka hapur tashmë 24 kapituj negociatash, ndërsa vetëm në dy muajt e fundit janë hapur grupkapitujt e dytë dhe të tretë”, u shpreh ajo.
Sipas saj, Shqipëria ka kuptuar vrullin e ri të procesit të zgjerimit dhe ka përshpejtuar reformat, veçanërisht në fushat kyçe si sundimi i ligjit dhe integrimi në sistemin evropian të sigurisë.
Kos nënvizoi se shteti i së drejtës mbetet një kusht i panegociueshëm për integrimin dhe deklaroi se gjatë mandatit të saj do të ketë anëtarësime të reja nga Ballkani Perëndimor.
“Me kryeministrin Edi Rama kemi një marrëveshje të qartë. Kam këmbëngulur gjithmonë që ky proces të bazohet në meritë. Tani kemi rënë dakord të realizojmë më në fund atë ‘martesë’ të Shqipërisë me Evropën”, përfundoi Komisionerja për Zgjerimin.
