Një ngjarje tragjike ka ndodhur mëngjesin e sotëm në Prishtinë, ku një person i moshuar është gjetur pa shenja jete në Lagjen e Muhaxherëve.
Sipas informacioneve të konfirmuara nga Policia për Gazetën Insajderi, dyshohet se viktima ka rënë nga një ndërtesë e lartë. Ngjarja ka ndodhur rreth orës 06:00 të mëngjesit.
“Rreth orës 06:00 është marrë informata për një person (mashkull) pa shenja jete, në Lagjen e Muhaxherëve në Prishtinë. Vdekja e tij është konstatuar nga ekipi i mjekëve emergjent në vendin e ngjarjes. Policia, në koordinim me prokurorinë, ka nisur hetimet për zbardhjen e rrethanave që karakterizojnë rastin,” njoftoi zëdhënësi i Policisë.
Gazeta Insajderi mëson se viktima është një burrë rreth moshës 84-vjeçare. Rrethanat e plota të ngjarjes mbeten ende të paqarta, ndërkohë që autoritetet janë duke e trajtuar rastin me prioritet.
