Presidenti amerikan Donald Trump ka shpallur ndalimin e hyrjes në Shtetet e Bashkuara për shtetasit e 12 vendeve, një masë që, sipas tij, synon “mbrojtjen e vendit nga terroristët e huaj”.
Vendimi u publikua të mërkurën nga Shtëpia e Bardhë përmes një dokumenti zyrtar dhe do të hyjë në fuqi të hënën, më 9 qershor. Shtetasit e prekur janë ata nga Afganistani, Mianmari, Çadi, Republika Demokratike e Kongos, Guinea Ekuatoriale, Eritrea, Haiti, Irani, Libia, Somalia, Sudani dhe Jemeni.
Përveç ndalimit të hyrjes për këto 12 shtete, administrata Trump njoftoi se do të vendosë kufizime të rrepta shtesë për shtetasit nga shtatë vende të tjera: Burundi, Kuba, Laosi, Sierra Leone, Togo, Turkmenistani dhe Venezuela.
Sipas presidentit Trump, masa është një përgjigje direkte ndaj një sulmi të ndodhur të dielën në Kolorado, ku një person hodhi mjete zjarrvënëse mbi një grup pjesëmarrësish në një marshim në mbështetje të pengjeve izraelite të mbajtura në Rripin e Gazës. Sipas të dhënave të Shtëpisë së Bardhë, autori i dyshuar i sulmit ndodhej në SHBA në mënyrë të paligjshme.
Administrata ka theksuar se ky vendim është pjesë e një strategjie më të gjerë për të garantuar sigurinë kombëtare dhe për të parandaluar hyrjen e personave që paraqesin rrezik për vendin.
