Myslimanët anembanë globit, përfshirë edhe besimtarët në Kosovë, sot po festojnë Kurban Bajramin, një ndër festat më të rëndësishme të Islamit, që simbolizon sakrificën ndaj Zotit dhe humanitetin ndërnjerëzor.
Manifestimi qendror i kësaj feste madhështore në Kosovë u zhvillua në “Xhaminë e Madhe” në Prishtinë, ku qindra besimtarë u mblodhën për të falur namazin e Kurban Bajramit, i cili u krye në orën 05:35 të mëngjesit.
Në vazhdën e traditës, Kryesia e Bashkësisë Islame të Kosovës (BIK) hapi dyert e saj për pritjen e urimeve në selinë e institucionit, nga ora 09:00 deri në 12:00. Kjo pritje shërben si një moment i rëndësishëm bashkimi dhe solidariteti ndërmjet përfaqësuesve të institucioneve, komunitetit fetar dhe qytetarëve.
Me rastin e kësaj feste të shenjtë, Myftiu i Kosovës, Naim Tërnava, përcolli një mesazh urimi për të gjithë besimtarët myslimanë. Ai theksoi domethënien e thellë shpirtërore të Kurban Bajramit, duke nënvizuar se kjo ditë përkujton sakrificën e profetit Ibrahim (a.s.), i cili ishte i gatshëm të flijonte më të dashurin e tij për hir të bindjes ndaj Zotit.
“Kjo ditë e bekuar le t’ju gjejë me zemra të qeta, me shëndet dhe mirëqenie, me familje të bashkuara dhe me besim të thelluar në vlerat më të larta shpirtërore,” tha Myftiu Tërnava.
Ai gjithashtu shtoi se Kurban Bajrami është një moment reflektimi dhe afërsie me Zotin, por edhe një thirrje për përgjegjësi sociale, solidaritet dhe bujari: “Zemrat e besimtarëve mbushen me mirënjohje dhe përkushtim, ndërsa duart e tyre shtrihen në ndihmë dhe dashamirësi.”
Festa e Kurban Bajramit shënon gjithashtu një periudhë të rëndësishme të flijimit dhe shpërndarjes së mishit të kurbanit për të ndihmuar më të varfërit dhe të nevojshmit – një akt i thellë i dashurisë dhe dhembshurisë në mesin e komunitetit.
Gëzuar Kurban Bajramin – me paqe, mirësi dhe mëshirë për të gjithë!
