Sipërmarrësi i njohur shqiptar dhe aksionari i Devolli Corporation, Shkëlqim Devolli, është pritur sot në një takim zyrtar nga kryeministri i Maqedonisë së Veriut, Hristijan Mickoski.
Në qendër të diskutimeve ishin aktivitetet aktuale të kompanisë në territorin e Maqedonisë së Veriut, si dhe mundësitë për zgjerimin e investimeve në sektorë strategjikë si prodhimi industrial, media dhe infrastruktura.
Gjatë takimit, Devolli prezantoi planet konkrete për rritjen e kapaciteteve prodhuese, zhvillimin e projekteve në fushën e medias dhe përfshirjen në infrastrukturë, me qëllim forcimin e pranisë ekonomike të grupit në vendin fqinj.
Kryeministri Mickoski u shpreh i gatshëm të mbështesë iniciativat e Devolli Corporation, duke ofruar lehtësira institucionale dhe mbështetje të drejtpërdrejtë për investitorët seriozë. Ai vlerësoi cilësinë dhe reputacionin e produkteve të kompanisë, duke deklaruar:
“Produktet me vulën Devolli janë të njohura për standardin e tyre të lartë. Qeveria jonë është e hapur për bashkëpunime që kontribuojnë në zhvillimin ekonomik të Maqedonisë së Veriut.”
Takimi u cilësua si një hap i rëndësishëm për forcimin e marrëdhënieve midis biznesit privat shqiptar dhe institucioneve shtetërore maqedonase, duke hapur rrugën për projekte të reja investimi dhe rritje të ndikimit ekonomik të Devolli Corporation në rajon.
Aktualisht, kompania është e pranishme në Maqedoninë e Veriut përmes rrjetit të dyqaneve “Comodita Home”, ndërsa portofoli i saj i investimeve vazhdon të zgjerohet me ritme të shpejta.
