Presidentja e Kosovës, Vjosa Osmani, ka uruar të gjithë besimtarët myslimanë me rastin e festës së Kurban Bajramit, duke u dëshiruar paqe, harmoni dhe begati në familjet e tyre.
Në mesazhin e saj urues, Presidentja Osmani theksoi se Kurban Bajrami është një thirrje për reflektim mbi vlerat më të larta njerëzore, si dhe për forcimin e lidhjeve të dashurisë, solidaritetit dhe mirëkuptimit ndërmjet njerëzve.
“Kjo festë shpërfaq shpirtin e solidaritetit dhe na kujton rëndësinë e sakrificës, përkushtimit dhe ndihmës ndaj njëri-tjetrit,” tha ajo.
Presidentja uroi që në çdo shtëpi të mbizotërojë gëzimi, shëndeti dhe dashuria, duke e konsideruar festën një burim frymëzimi për një të ardhme më të ndritur, me më shumë dhembshuri dhe respekt të ndërsjellë.
“Gëzuar dhe me fat Kurban Bajramin!” përfundoi Osmani.
