Një tentativë për futjen e substancave të dyshuara narkotike brenda Qendrës Korrektuese të Dubravës është parandaluar nga zyrtarët korrektues gjatë një kontrolli rutinë në sallën e vizitave.
Sipas njoftimit zyrtar të Shërbimit Korrektues të Kosovës (SHKK), gjatë një bastisjeje të zakonshme në kabinën e kontrollit, zyrtarët kanë zbuluar një vizitor që mbante drogë të fshehur në trupin e tij. “Vizita është anuluar menjëherë dhe personi është ndaluar në sallën e vizitave,” thuhet në deklaratën e SHKK-së.
Pas identifikimit të substancës së dyshuar narkotike, rasti është referuar Policisë së Kosovës, e cila ka nisur hetimet dhe procedurat ligjore për ndjekje penale.
SHKK ka rikujtuar zotimin e saj për tolerancë zero ndaj çdo përpjekjeje për kontrabandë dhe ka njoftuar se masat e sigurisë dhe kontrollit do të vazhdojnë me intensitet të shtuar.
“Do të vijojmë me zbatimin e kontrolleve rigoroze për të parandaluar futjen e materialeve të ndaluara në institucionet tona,” përfundon njoftimi zyrtar.
