Pas gati dy muaj ngecjesh dhe përpjekjesh të pasuksesshme, Kuvendi i Kosovës pritet të mblidhet sot në orën 11:00 për të tentuar për herë të 29-të konstituimin e tij dhe zgjedhjen e kryetarit. Kjo seancë vjen si një tjetër përpjekje për të zhbllokuar procesin politik që ka ngecur pas zgjedhjeve të mbajtura më 9 shkurt.
Bllokimi i procesit ka ardhur si pasojë e mospajtimeve të thella mes partive politike lidhur me zgjedhjen e kryetarit të Kuvendit. Lëvizja Vetëvendosje (LVV), e cila doli fituese në zgjedhje, nuk ka arritur të sigurojë shumicën e nevojshme për të emëruar kandidaten e saj, Albulena Haxhiu, në krye të Kuvendit.
Partitë opozitare – Partia Demokratike e Kosovës (PDK), Lidhja Demokratike e Kosovës (LDK), Aleanca për Ardhmërinë e Kosovës (AAK) dhe NISMA – kanë kundërshtuar emrin e propozuar nga LVV, duke e lënë procesin e bllokuar. Deri tani, emri i Haxhiut është hedhur në votim gjashtë herë, por pa sukses. Për këtë arsye, përfaqësuesit e LVV-së, bashkë me Guxo dhe Alternativën, po kërkojnë që votimi të zhvillohet në mënyrë të fshehtë, në përpjekje për të siguruar mbështetje individuale nga deputetët.
Ndërkohë, kryetari i LDK-së, Lumir Abdixhiku, paralajmëroi mbrëmë përmes një postimi në Facebook se edhe seanca e sotme mund të përfundojë pa ndonjë rezultat. Ai ka propozuar krijimin e një Qeverie të Unitetit dhe ka bërë të ditur se do të prezantojë një agjendë bashkëpunimi me 15 pika konkrete.
Nëse dështon edhe kjo përpjekje, vendi përballet me një krizë të thelluar institucionale, e cila mund të çojë deri në shpërbërjen automatike të Kuvendit dhe mundësinë për organizimin e zgjedhjeve të reja.
Situata mbetet e tensionuar, ndërsa qytetarët presin me shqetësim epilogun e seancës së sotme.
