E enjtja në Kosovë pritet të karakterizohet nga moti kryesisht me diell dhe i nxehtë veror, megjithatë pa temperatura ekstreme. Sipas parashikimeve meteorologjike, temperaturat minimale do të zbresin deri në 11°C, ndërsa ato maksimale do të arrijnë deri në 29°C në Rrafshin e Kosovës dhe deri në 31°C në Rrafshin e Dukagjinit. Në disa zona të vendit parashikohen erëra të freskëta nga veriu, që do të sjellin pak lehtësim në vapën e mesditës.
Në rajon, përfshirë Shqipërinë, Maqedoninë e Veriut, Luginën e Preshevës dhe Malin e Zi, do të mbajë mot kryesisht me diell dhe mjaft i nxehtë veror. Zonat perëndimore të Shqipërisë do të përballen me temperatura më të larta, ndërsa në viset jugore dhe lindore të Shqipërisë dhe në perëndim të Maqedonisë së Veriut, gjatë orëve të pasdites priten rrebeshe të izoluara shiu të shoqëruara me vetëtima dhe bubullimë.
Përkundër prezencës së ndonjë reshjeje lokale, moti në tërësi mbetet stabil dhe tipik për ditët e para të verës, me dominim të diellit dhe kushte të favorshme për aktivitete në natyrë.
