E premtja në Kosovë do të sjellë mot tipik veror, me diell dhe temperatura të ngrohta, por pa arritur vlera ekstreme. Sipas parashikimeve, temperaturat maksimale do të luhaten nga 28 deri në 31 gradë Celsius, ndërsa erëra të freskëta nga veriu pritet të fryjnë në disa zona, duke sjellë pak lehtësim nga nxehtësia.
Edhe në Shqipëri, Maqedoninë e Veriut, Luginën e Preshevës dhe Malin e Zi, e premtja do të karakterizohet nga moti kryesisht me diell dhe i nxehtë, tipik për stinën e verës. Ndonëse temperaturat do të jenë të larta, nuk parashikohet ndonjë valë ekstreme nxehtësie.
Megjithatë, pasditja vonë mund të sjellë zhvillime lokale të rrebesheve të shiut, të shoqëruara me vetëtima dhe bubullima, kryesisht në zonat kodrinore dhe malore të jug-juglindjes së Shqipërisë si dhe në disa pjesë të perëndimit të Maqedonisë së Veriut.
Në përgjithësi, fundjava pritet të nisë me kushte të favorshme për aktivitete në natyrë, por qytetarët në zonat kodrinore këshillohen të kenë kujdes ndaj mundësisë së reshjeve të përkohshme.
