Kryeqyteti iranian, Teherani, është goditur nga sulme ajrore të Izraelit në orët e para të së premtes, në një zhvillim dramatik që vjen pas rritjes së tensioneve për shkak të përshpejtimit të programit bërthamor të Iranit.
Banorët janë zgjuar nga shpërthime të fuqishme, ndërsa televizioni shtetëror iranian ka konfirmuar zyrtarisht se ka pasur bombardime, pa dhënë fillimisht hollësi mbi objektivat e goditura. Pamje nga terreni kanë treguar tym të dendur mbi lagjen Chitgar, në pjesën perëndimore të qytetit, megjithëse ende nuk është konfirmuar zyrtarisht se cili ishte objektivi kryesor i sulmit.
Vetëm pas disa orësh heshtjeje, Izraeli njoftoi se sulmet kishin në shënjestër vendet e prodhimit të armëve bërthamore në Iran, duke e cilësuar aksionin si pjesë e strategjisë për të ndalur ambiciet bërthamore të Teheranit.
Ky veprim vjen vetëm pak ditë pas kritikave të ashpra të Agjencisë Ndërkombëtare për Energjinë Atomike (IAEA) ndaj Iranit – të parat të kësaj natyre në mbi 20 vjet – për mospunimin me inspektorët ndërkombëtarë. Në reagim, autoritetet iraniane kishin paralajmëruar hapjen e një hapësire të tretë për pasurimin e uraniumit, si dhe zëvendësimin e centrifugave ekzistuese me versione më të avancuara.
Izraeli prej vitesh ka deklaruar se nuk do të lejojë Iranin të armatoset me kapacitete bërthamore, ndonëse Irani zyrtarisht këmbëngul se programi i tij ka qëllime paqësore.
Ndërkohë, Shtetet e Bashkuara kishin dhënë sinjale të hershme për mundësinë e një përshkallëzimi, pasi të enjten kishin tërhequr diplomatë nga Iraku dhe kufizuar lëvizjet e zyrtarëve në rajon.
Ish-presidenti amerikan, Donald Trump, kishte deklaruar më herët se nuk e mbështeste një ndërhyrje të tillë nga Izraeli, duke paralajmëruar se një sulm ndaj Iranit do të rrezikonte negociatat për programin bërthamor që SHBA-ja ka synuar të ringjallë.
Ky zhvillim pritet të sjellë reagime të fuqishme ndërkombëtare dhe mund të ndikojë ndjeshëm në sigurinë dhe balancat gjeopolitike të Lindjes së Mesme.
