Partia Demokratike e Kosovës (PDK) ka reaguar ashpër ndaj vendimit të Zyrës së Rregullatorit për Energji (ZRRE), e cila ka refuzuar kundërshtimin administrativ për kalimin e mbi 1300 bizneseve në tregun e lirë të energjisë elektrike – një hap që, sipas kësaj partie, paraqet kërcënim serioz për ekonominë dhe punësimin në vend.
Në një komunikatë për media, PDK e cilësoi vendimin si “të padrejtë, joprofesional, të njëanshëm dhe me prapavijë politike”. Sipas tyre, ZRRE, që sipas mandatit duhet të mbrojë interesin publik dhe të jetë në shërbim të qytetarëve, po injoron pasojat e rënda që ky vendim mund të sjellë për sektorin privat – të cilin e cilësojnë si shtyllën kryesore të zhvillimit ekonomik dhe punësimit në Kosovë.
“ZRRE ka zgjedhur t’i mbyllë sytë para pasojave katastrofike të këtij vendimi për sektorin privat”, thuhet në reagimin e PDK-së, ku theksohet se këto masa pritet të rëndojnë ndjeshëm barrën financiare për bizneset, duke rrezikuar drejtpërdrejt qindra mijëra vende pune.
PDK ka paralajmëruar se do të ndjekë të gjitha rrugët ligjore për ta kundërshtuar vendimin. “Ne e kemi ngritur zërin dhe do të vazhdojmë ta ngremë. Lufta jonë nuk ndalet me një letër refuzuese. Ajo është për punëtorët, për rrogat e tyre, për mirëqenien e familjeve të tyre”, thuhet më tej.
Partia ka bërë të ditur se do ta çojë këtë çështje në Gjykatë, duke kërkuar që vendimi të rrëzohet në instancat e drejtësisë. “Jemi të bindur se e drejta është në anën tonë dhe nuk do të ndalemi përballë asnjë institucioni që zbaton politika të dëmshme, pa ndjeshmëri sociale e pa përgjegjësi shtetërore.”
PDK përfundon komunikatën duke deklaruar se zëri i tyre përfaqëson më shumë se 150 mijë punëtorë të sektorit privat, të cilët përballen me rrezikun e humbjes së vendeve të punës për shkak të faturave të papërballueshme të energjisë.
