Prokuroria Speciale e Kosovës (PSRK) ka lëshuar letër-rreshtim vendor dhe ndërkombëtar ndaj Milan Radoiçiqit për rastin e vendosjes së barrikadave në katër komunat veriore të Kosovës gjatë vitit 2022.
Zëdhënësja e PSRK-së, Arbnora Luta, konfirmoi se përveç Radoiçiqit, janë lëshuar urdhër-arreste edhe për 10 persona të tjerë të dyshuar në lidhje me këtë çështje.
“Gjykata Themelore në Prishtinë ka aprovuar kërkesën e Prokurorisë Speciale për lëshimin e letër-rreshtimit vendor dhe ndërkombëtar ndaj Milan Radoiçiqit. Ky urdhër-arrest është pjesë e veprimeve hetimore lidhur me vendosjen e barrikadave në katër komunat veriore në vitin 2022. Përveç tij, urdhër-arreste janë lëshuar edhe ndaj 10 personave të tjerë të dyshuar,” tha Luta.
Ajo bëri të ditur se aktualisht po hetohen rreth 50 persona për vepra penale që përfshijnë pengim të personit zyrtar në kryerjen e detyrave, thirrje për rezistencë dhe bashkim për veprimtari kundër kushtetuese.
“Rasti është në fazë hetimesh dhe për veprime të mëtejshme publiku do të njoftohet në kohë, por aktualisht nuk mund të ndajmë më shumë detaje,” shtoi Luta.
