Një përplasje e re verbale ka shpërthyer në skenën politike kosovare, këtë herë mes kryetarit të LDK-së, Lumir Abdixhikut, dhe bashkëudhëheqësit të Guxo-s, Faton Peci.
Reagimi i Pecit erdhi pas deklaratës së Abdixhikut një ditë më parë, ku ai, në një prononcim mediatik, e cilësoi ministren në detyrë Donika Gërvalla si “të paedukatë” dhe me “mungesë të theksuar të inteligjencës”.
Në një postim në Facebook, Peci e quajti deklaratën e Abdixhikut “të tmerrshme” dhe “ofenduese”, duke mbrojtur bashkëpartiaken e tij në Guxo dhe duke theksuar kontributin e familjes Gërvalla në historinë kombëtare shqiptare.
“Nëse i thua Donikës ‘e paedukatë’, atëherë e ke fyer heroin e Kosovës, Jusuf Gërvallën, heroinën Suzanën, dhe Nanën Ajshe – shtyllën e kësaj familjeje dhe institucion të qenies shqiptare,” shkroi Peci, ndërsa në fund të reagimit u drejtua me fjalët:
“Ku je i lidhur ti me këto shtylla, o Lumir pishpiriku?”
Në reagimin e tij, Peci përmendi edhe figura kyçe të historisë kombëtare si Ibrahim Rugova, familja Jashari, dhe dëshmorët Jusuf Gërvalla, Bardhosh Gërvalla e Kadri Zeka, duke i ndërlidhur me rrënjët dhe angazhimin politik e kombëtar të Donika Gërvallës.
Ky zhvillim vjen në sfondin e tensioneve mes Lëvizjes Vetëvendosje dhe LDK-së, ku po flitet për qëndrime kontradiktore rreth bashkëpunimeve të mundshme politike me PDK-në dhe Listën Serbe.
Reagimet nga palët pritet të vazhdojnë në ditët në vijim, me përplasje që tashmë kanë kaluar kufijtë e debatit politik dhe janë zhvendosur drejt fyerjeve personale.
