Startup-i i inteligjencës artificiale xAI, i themeluar nga Elon Musk, është duke humbur rreth 1 miliard dollarë në muaj, sipas një raporti të publikuar nga Bloomberg. Kompania, e cila ka zhvilluar chatbot-in Grok dhe synon të sfidojë gjigantët e AI-së, pritet të përfundojë vitin 2025 me një humbje totale prej 13 miliardë dollarësh.
Sipas Bloomberg, humbjet e mëdha vijnë si rezultat i kostove të larta të zhvillimit të modeleve të avancuara të inteligjencës artificiale, ndërkohë që të ardhurat janë ende modeste. Parashikimet flasin për rreth 500 milionë dollarë të ardhura gjatë këtij viti, me pritshmëri për 2 miliardë dollarë në vitin 2026.
Pavarësisht raportit, kompania nuk ka komentuar zyrtarisht. Vetë Elon Musk reagoi në rrjetin social X (ish-Twitter), duke e quajtur artikullin e Bloomberg si “të pakuptimtë”.
Kërkohen mbi 9 miliardë dollarë për të mbuluar humbjet
Gjiganti teknologjik është aktualisht në përpjekje për të siguruar 9.3 miliardë dollarë përmes borxheve dhe kapitalit aksionar, në mënyrë që të përballojë boshllëkun financiar që ka krijuar zhvillimi agresiv i teknologjisë.
xAI është pjesë e xAI Holdings, një strukturë e re e krijuar nga Musk në mars të këtij viti, ku ai ka bashkuar rrjetin social X dhe kompaninë e AI-së. Marrëveshja e brendshme vlerësoi xAI në rreth 80 miliardë dollarë, ndërsa X në 33 miliardë dollarë, duke e çuar vlerën e kombinuar të korporatës në mbi 100 miliardë dollarë.
Musk beson në fitime që nga viti 2027
Sipas parashikimeve të Musk, startup-i mund të dalë me fitim që në vitin 2027, falë sinergjisë së krijuar nga bashkimi me X. Kjo pritet të lejojë trajnimin e modeleve të AI në të dhënat e rrjetit social dhe të ulë ndjeshëm kostot e operimit.
Pavarësisht humbjeve aktuale, rritja globale e kërkesës për inteligjencë artificiale gjeneruese e ka pozicionuar xAI si një nga aktorët më ambiciozë në këtë sektor, me një mbështetje të pakrahasueshme: pronarin më të pasur në botë, Elon Musk.
