Kompania për Shpërndarjen e Energjisë Elektrike në Kosovë (KESCO) ka njoftuar se prodhimi vendor i energjisë elektrike vazhdon të jetë i kufizuar, ndërkohë që kërkesa po rritet për shkak të temperaturave të larta që kanë përfshirë vendin ditëve të fundit.
Sipas njoftimit zyrtar, aktualisht Njësia A3 po prodhon rreth 110 megavatë, ndërsa pjesa tjetër e kërkesës për energji do të mbulohet përmes importeve nga tregjet ndërkombëtare.
KESCO bën të ditur se rritja e konsumit lidhet kryesisht me përdorimin masiv të kondicionerëve, teksa thekson se ka ndërmarrë masat e nevojshme për të garantuar furnizim të qëndrueshëm dhe pa ndërprerje për qytetarët.
Kompania u bën thirrje të gjithë konsumatorëve që të kontribuojnë në kursimin e energjisë, sidomos nëpërmjet përdorimit efikas të pajisjeve për ftohje. Sipas KESCO-s, “çdo kilovat-orë i kursyer ndihmon në uljen e ngarkesës së sistemit dhe në reduktimin e kostos së përgjithshme të energjisë”.
Në fund të njoftimit, KESCO falënderon qytetarët për mirëkuptimin dhe bashkëpunimin, ndërsa siguron se do të vazhdojë të monitorojë situatën me prioritet të lartë.
