Rreth 21 maturantë nga Gjilani pretendojnë se janë larguar padrejtësisht nga provimi i maturës shtetërore, i cili u mbajt në ambientet e Shkollës së Muzikës dhe Arteve në këtë qytet. Sipas tyre, përjashtimi ndodhi para se të shpërndaheshin fletët e provimit, me arsyetimin se telefonat mobil i kishin lënë në tavolinën përpara klasës, në vendin ku zakonisht qëndrojnë mësimdhënësit.
Një nga nxënëset e përjashtuara deklaroi për KlanKosova.tv se përjashtimi erdhi në momentin kur profesori përgjegjës kishte nisur shpërndarjen e testeve. “Në klasë ka hyrë një zyrtar i MAShTI-t, i cili na ka larguar të gjithë klasën,” tha ajo.
Reagimi i Drejtorisë Komunale të Arsimit në Gjilan
I kontaktuar nga KlanKosova.tv, drejtori i Arsimit në Komunën e Gjilanit, Shpend Nuhiu, konfirmoi se është njoftuar për rastin nga prindërit e nxënësve. Ai theksoi se maturantët ishin informuar paraprakisht për ndalesën e përdorimit të pajisjeve elektronike gjatë provimit.
“Më është bërë e ditur se nxënësit në fjalë janë njoftuar edhe kur kanë hyrë, edhe nëpërmjet sistemit E-Kosova, madje edhe shkollat kanë shpërndarë pamflete me njoftime se pajisjet elektronike, si telefonat dhe orët e mençura, janë të ndaluara,” tha Nuhiu.
Sipas tij, në qendrën ku ndodhi incidenti janë larguar gjithsej 21 nxënës dhe pajisjet e tyre janë lënë në bankën përpara klasës, gjë që sipas rregullores është shkelje.
Ankesat drejtuar MAShTI-t
Drejtori Nuhiu tha se nxënësit kanë të drejtë të paraqesin ankesë zyrtare në Ministrinë e Arsimit, Shkencës, Teknologjisë dhe Inovacionit (MAShTI), nëse besojnë se u është bërë padrejtësi.
“Nëse mendojnë se u është bërë e padrejtë, pakënaqësitë mund t’i shprehin dhe të dërgojnë ankesa zyrtare në MAShTI,” tha ai, duke shtuar se udhëzimet për ndalesën e pajisjeve elektronike janë të njëjta prej vitesh.
Nxënësit e përjashtuar kanë paralajmëruar se të hënën do ta dorëzojnë ankesën e tyre zyrtare në MAShTI, duke kërkuar rishqyrtim të rastit dhe të drejtën për të përsëritur provimin.
