Presidenti amerikan, Donald Trump, ka njoftuar një armëpushim “të plotë” mes Izraelit dhe Iranit, i cili pritet të hyjë në fuqi brenda gjashtë orësh. Përmes një postimi në rrjete sociale, Trump ka deklaruar se të dyja palët do të përfundojnë operacionet ushtarake përpara fillimit të marrëveshjes, e cila do të çojë në ndërprerjen e armiqësive “brenda 24 orëve”.
Trump e quajti konfliktin “Lufta 12-ditore”, duke theksuar se u shmang një përshkallëzim që mund të kishte shkatërruar Lindjen e Mesme. Ai falënderoi Iranin për “paralajmërimin” para sulmit në bazën ajrore amerikane në Katar, duke nënvizuar se nuk ka pasur të lënduar dhe dëmet kanë qenë minimale.
Izraeli dhe Irani ende nuk kanë komentuar zyrtarisht mbi njoftimin. Konflikti nisi më 13 qershor, pas sulmit të papritur të Izraelit në objektet bërthamore të Iranit, që më pas u pasua nga shkëmbime raketore dhe humbje jete në të dyja anët.
Ekspertët ndërkombëtarë e përshkruajnë përgjigjen iraniane si “simbolike” dhe të kalibruar për të shmangur përshkallëzimin e mëtejshëm. Ndërkohë, situata mbetet e tensionuar, megjithatë, armëpushimi i mundshëm shihet si një hap i rëndësishëm drejt stabilizimit të rajonit.
