Kuvendi i Kosovës do të mblidhet sot për herë të 37-të në përpjekje për t’u konstituuar dhe për të zgjedhur kryetarin e tij, pas më shumë se dy muajsh bllokadë institucionale. Seanca është paraparë të fillojë në orën 11:00, megjithatë mbetet e paqartë nëse do të ketë ndonjë zhvillim konkret apo përsëritje të dështimeve të mëparshme.
Në seancën e fundit, Kuvendi nuk arriti të formojë Komisionin për votimin e fshehtë, një hap thelbësor për zgjedhjen e kryetarit të Kuvendit. Shkak për këtë ngecje po mbetet refuzimi i partive opozitare për të propozuar anëtarë në këtë komision.
Ndërkohë, Lëvizja Vetëvendosje po vazhdon të insistojë në kandidaturën e Albulena Haxhiut, e cila deri më tani nuk ka siguruar mbështetjen e nevojshme për t’u zgjedhur kryetare.
Që nga 15 prilli, Kuvendi ka dështuar 36 herë për t’u konstituuar, duke lënë institucionin pa funksion dhe pa udhëheqje të re.
