Kryetari i Bashkisë së Lezhës, Pjerin Ndreu, ka njoftuar për një model të ri menaxhimi të plazheve, që synon të eliminojë çmimet e larta dhe të ofrojë shërbime më të përballueshme, sidomos për pushuesit nga Kosova.
Në një intervistë për “Debat Plus”, Ndreu tha se është vendosur një formulë e re që u jep të drejtë vetëm hoteleve të vendosin çadra në raportin një me dy – për çdo 50 dhoma hoteli, lejohet vendosja e 100 çadrave. Ai shtoi se disa kontrata ekzistuese pesëvjeçare nuk mund të ndryshohen këtë sezon, por viti i ardhshëm do të sjellë përmirësime të mëdha.
Ndreu theksoi gjithashtu se Lezha është e vetmja bashki që ka ndërtuar një sistem të kontrolluar me pagesa të arsyeshme: “Në Tale vetëm 3 euro, në qendër të Shëngjinit 4 euro, dhe 5 euro në Ranën e Hedhun. Dhe për ata që preferojnë, hapësirat publike janë të lira për të vendosur çadrën e tyre”.
Ai siguroi qytetarët se nuk do të përballen më me çmime të tepruara si 20 apo 40 euro për një vend në plazh.
