Lidhja Demokratike e Kosovës (LDK) ka reaguar të premten përmes një komunikate për media, duke mirëpritur aktgjykimin e Gjykatës Kushtetuese lidhur me çështjen e konstituimit të Kuvendit të Kosovës, përgjegjësitë e grupit më të madh parlamentar dhe mënyrën e votimit në seancën konstituive.
Sipas LDK-së, aktgjykimi i publikuar nga Kushtetuesja ka sqaruar në mënyrë të qartë se grupi më i madh parlamentar nuk ka të drejtë të bllokojë konstituimin e Kuvendit, por duhet të sigurojë shumicën e votave ose të arrijë konsensus me grupet tjera parlamentare.
Në komunikatë, LDK thekson rëndësinë e zbatimit të paragrafit 187 të aktgjykimit, i cili përcakton se kryesuesi i seancës konstituive është i obliguar të respektojë Kushtetutën, Kapitullin IV të Rregullores së Punës së Kuvendit dhe praktikat parlamentare të mëparshme. Kjo përfshin kthimin në skenarin e dakorduar të seancës dhe zhvillimin e votimit në mënyrë të hapur.
“LDK rithekson përkushtimin e saj për një parlamentarizëm funksional, respektim të Kushtetutës dhe ndërtimin e **institucioneve përfaqësuese që burojnë nga vullneti i qytetarëve dhe rregullat demokratike”, thuhet në komunikatë.
Në fund, LDK u bën thirrje grupit më të madh parlamentar që të respektojë vendimin e Gjykatës Kushtetuese, të ndalë bllokadat dhe të kontribuojë në konstituimin sa më të shpejtë dhe të rregullt të Kuvendit të Republikës së Kosovës.
