Komisioni Qendror i Zgjedhjeve (KQZ) ka njoftuar se më 28 qershor 2025 ka nisur periudha për ndërrimin e Qendrës së Votimit brenda komunës, për Zgjedhjet Lokale të ardhshme. Ky proces do të zgjasë deri më 29 gusht 2025, duke u ofruar qytetarëve një afat 63-ditor për të kryer ndryshimet e nevojshme.
Sipas njoftimit të KQZ-së, gjatë kësaj periudhe të gjithë qytetarët me të drejtë vote kanë mundësi të kontrollojnë vendndodhjen aktuale të Qendrës së Votimit dhe, nëse dëshirojnë, ta ndryshojnë atë, duke e afruar më shumë me vendbanimin e tyre në kuadër të të njëjtës komunë.
Ndërrimi i Qendrës së Votimit mund të realizohet në mënyrë të lehtë përmes platformës elektronike të KQZ-së: https://qv.kqz-ks.org, ose fizikisht duke dorëzuar kërkesën në Komisionin Komunal të Zgjedhjeve në komunën ku është i regjistruar votuesi.
KQZ u bën thirrje të gjithë qytetarëve që ta shfrytëzojnë këtë mundësi për të lehtësuar procesin e votimit dhe për të garantuar një pjesëmarrje më të qetë dhe efikase në ditën e zgjedhjeve.
