Sot në Shkup mbahet takimi i liderëve të Bashkimit Evropian dhe Ballkanit Perëndimor, i fokusuar në Planin e Rritjes për rajonin, me pjesëmarrjen e kryeministrit të Maqedonisë së Veriut, Hristijan Mickoski, dhe Komisioneres për Zgjerim të BE-së, Marta Kos. Ngjarja zhvillohet në hotelin “Hilton” dhe synon forcimin e integrimit ekonomik dhe përshpejtimin e reformave në vendet kandidate për anëtarësim në BE.
Maqedonia e Veriut do të përfitojë 750 milionë euro nga fondi total prej 6 miliardë eurosh i Planit për Rritje, i miratuar nga Komisioni Evropian më 8 nëntor 2023. Plani mbështetet në katër shtylla kyçe: integrimi ekonomik në tregun unik të BE-së, krijimi i një tregu të përbashkët rajonal, përshpejtimi i reformave strukturore dhe rritja e mbështetjes financiare.
Agjenda dhe fjalimet kryesore
Takimet kanë nisur të hënën në orën 16:00 me një takim tet-a-tet mes kryeministrit Mickoski dhe Komisioneres Kos, ndjekur nga një takim bilateral me delegacionet zyrtare. Sot, në orën 9:30, pritet pritja zyrtare e liderëve të Ballkanit Perëndimor, ndërsa në orën 10:00 fillon paneli i parë, ku do të mbajnë fjalime hyrëse kryeministri Mickoski dhe Komisionerja Kos.
Deklaratat e Komisioneres Kos
Në prag të samitit, Komisionerja për Zgjerim, Marta Kos, deklaroi se procesi i zgjerimit të BE-së është më shumë sesa ekonomik – është një proces transformues për të gjithë shoqërinë. Ajo theksoi nevojën për lidership të qartë në vendet kandidate dhe angazhim për reforma, duke përfshirë harmonizimin e legjislacionit me atë të BE-së, veçanërisht në fushën e prokurimeve publike.
“Procesi i zgjerimit është transformues jo vetëm për ekonominë, por për të gjithë shoqërinë. Na duhet një lidership i fortë, që është i gatshëm të heqë dorë nga një pjesë e pushtetit për të përmbushur reformat”, – theksoi Kos.
Shqipëria dhe Mali i Zi, në rrugë të shpejtë drejt BE-së
Komisionerja Kos nënvizoi se të gjithë grup-kapitujt me Shqipërinë do të hapen deri në fund të shtatorit, ndërsa theksoi gatishmërinë e Tiranës për të zbatuar reformat e nevojshme. Sipas saj, Shqipëria dhe Mali i Zi kanë potencial real për t’u anëtarësuar në BE përpara vitit 2030.
“Qeveria shqiptare po demonstron një gatishmëri të fortë për reforma. BE-ja mund të akomodojë lehtësisht pranimin e Malit të Zi dhe Shqipërisë. Megjithatë, për zgjerime të mëtejshme, nevojitet reformë e brendshme në procesin e vendimmarrjes brenda BE-së,” – deklaroi Kos, duke paralajmëruar ndryshime në mekanizmin aktual të votimit unanim për çështjet e zgjerimit.
Samiti i Shkupit pritet të shënojë një hap të rëndësishëm drejt konsolidimit të mbështetjes financiare dhe politike për vendet e Ballkanit Perëndimor në rrugën e tyre drejt Bashkimit Evropian.
