Kuvendi i Kosovës pritet të mblidhet sërish sot në përpjekjen e 40-të për t’u konstituuar, ndërkohë që kriza institucionale po zgjat tashmë gati pesë muaj pas zgjedhjeve të parakohshme parlamentare të mbajtura më 8 shkurt.
Përplasjet ndërmjet partive parlamentare për zgjedhjen e kryetarit të Kuvendit kanë pamundësuar formimin e organeve drejtuese të institucionit ligjvënës. Lëvizja Vetëvendosje po vazhdon të këmbëngulë në kandidaturën e deputetes Albulena Haxhiu për postin e kryetares së Kuvendit, por emri i saj nuk po pranohet si konsensual nga partitë e tjera opozitare dhe partnere potenciale.
Në këtë situatë të ngërçuar politik, një zhvillim i rëndësishëm ka ardhur nga Gjykata Kushtetuese e Republikës së Kosovës. Përmes aktgjykimit të publikuar ditë më parë në rastin KO124/25, Gjykata ka konstatuar se procesi i nisur më 15 prill për konstituimin e Kuvendit nuk është përmbyllur sipas parimeve kushtetuese, pasi mungon zgjedhja e Kryetarit dhe nënkryetarëve të Kuvendit – një kusht thelbësor për legjitimitetin e seancës konstituive.
Aktgjykimi erdhi pas kërkesës së paraqitur nga deputetja Time Kadrijaj dhe dhjetë deputetë të tjerë, të cilët kishin kontestuar vendimin për refuzimin e formimit të Komisionit për votim të fshehtë dhe një sërë veprimesh të tjera të ndërmarra në seancat e prillit dhe majit.
Gjykata nënvizoi se Seanca Konstituive ka natyrë kushtetuese dhe përfundon vetëm pas zgjedhjes së organeve drejtuese të Kuvendit. Në mungesë të këtij akti, çdo vendim i marrë në seancat e deritanishme nuk mund të konsiderohet i vlefshëm apo i legjitimuar nga procedura kushtetuese.
Situata aktuale vazhdon të thellojë bllokadën politike dhe institucionalen në vend, ndërsa qytetarët presin një zgjidhje që do të mundësonte funksionalizimin e Kuvendit dhe rifillimin e proceseve ligjvënëse.
