Presidenti i Shteteve të Bashkuara, Donald Trump, ka bërë të ditur se Izraeli ka rënë dakord me “kushtet e nevojshme” për të arritur një marrëveshje armëpushimi 60-ditor në Rripin e Gazës. Deklarata u publikua përmes një postimi në platformën e tij, Truth Social, ku Trump u shpreh se gjatë kësaj periudhe do të punohet me të gjitha palët për t’i dhënë fund konfliktit.
“Gjatë kësaj marrëveshjeje të propozuar, do të punojmë me të gjitha palët për t’i dhënë fund luftës,” shkroi ai, pa dhënë detaje konkrete mbi kushtet e marrëveshjes.
Trump gjithashtu theksoi rolin e rëndësishëm të Katarit dhe Egjiptit në procesin e ndërmjetësimit, duke njoftuar se këto dy vende do ta dorëzojnë propozimin përfundimtar tek palët në konflikt.
“Shpresoj që Hamasi ta pranojë këtë marrëveshje, sepse nuk do të ketë një ofertë më të mirë – DO TË SHKOJË VETËM PËRKEQ,” paralajmëroi Trump.
Izraeli gati për armëpushim, qëndrimi i Hamasit mbetet i paqartë
Ambasadori i Izraelit në OKB, Danny Danon, konfirmoi për mediat ndërkombëtare se Izraeli është “absolutisht” i gatshëm për armëpushim sipas kushteve të propozuara. Megjithatë, ende nuk ka asnjë përgjigje zyrtare nga ana e Hamasit lidhur me këtë ofertë.
Kjo zhvillim vjen në prag të një takimi të paralajmëruar për javën e ardhshme mes presidentit Trump dhe kryeministrit izraelit, Benjamin Netanyahu. Trump ka paralajmëruar se në këtë takim do të mbajë një qëndrim “shumë të ashpër”.
“Netanyahu dëshiron t’i japë fund luftimeve në Gaza. Mund t’ju them që ai dëshiron. Besoj se do të kemi një marrëveshje javën që vjen,” tha Trump, duke rritur pritshmëritë për një zgjidhje të mundshme të përkohshme në konfliktin izraelito-palestinez.
Për momentin, vëmendja ndërkombëtare mbetet e përqendruar te reagimi i Hamasit dhe ecuria e negociatave, që pritet të përcaktojnë nëse kjo iniciativë do të sjellë një pauzë në luftime apo do të mbetet një përpjekje tjetër e pasuksesshme diplomatike.
