Sot shënohet 35-vjetori i miratimit të Deklaratës Kushtetuese të 2 Korrikut 1990, një nga momentet më të rëndësishme historike në rrugën drejt pavarësisë së Kosovës.
Më 2 korrik të vitit 1990, në kushte të jashtëzakonshme dhe përballë një pranie të madhe të forcave policore e ushtarake jugosllave, 111 delegatë shqiptarë të Kuvendit të atëhershëm të Kosovës u mblodhën jashtë objektit të parlamentit në Prishtinë dhe shpallën Deklaratën Kushtetuese, duke e cilësuar Kosovën si njësi të pavarur dhe të barabartë brenda federatës apo konfederatës jugosllave.
Ky akt politik dhe juridik, i konsideruar si pikënisje e pavarësisë së Kosovës nga Serbia, përfaqësonte një reagim institucional ndaj shtypjes së të drejtave politike e kombëtare të shqiptarëve në Kosovë dhe vendoste themelet për aspiratat shtetformuese të vendit. Deklarata e 2 Korrikut shënoi fillimin e ndarjes formale dhe konceptuale të Kosovës nga struktura e kontrolluar nga Serbia dhe përçoi mesazhin e barazisë me republikat e tjera në ish-Jugosllavi.
Ngjarja historike e 2 Korrikut mbetet një simbol i guximit politik dhe përkushtimit të popullit të Kosovës për liri, barazi dhe vetëvendosje, duke e vendosur këtë datë ndër më të rëndësishmet në kalendarin e shtetësisë së Kosovës.
