Presidenti ukrainas Volodymyr Zelenskyy ka konfirmuar planet për një bisedë telefonike me presidentin amerikan Donald Trump, ndërsa Ukraina përballet me një pezullim të përkohshëm të dërgesave të ndihmës nga SHBA.
Duke folur nga Danimarka, ku po zhvillon takime me liderë europianë, përfshirë kryeministren daneze Mette Frederiksen, Zelenskyy ka komentuar pezullimin e dërgesave të SHBA-së. E ndërsa është pyetur për mundësinë që BE-ja të mbulojë boshllëkun e krijuar nga vonesat amerikane, Zelenskyy është shprehur me fjalët:
“Ne llogarisim te vazhdimi i mbështetjes amerikane. Ka disa sisteme që Europa thjesht nuk i ka,” ka thënë ai duke përmendur konkretisht raketat për sistemet Patriot si një nevojë thelbësore.
Tutje Zelensky ka konfirmuar se do të flasë me Trump, duke thënë se shpreson ta diskutojë këtë çështje gjatë bisedës me të.
“Shpresoj që ndoshta nesër… do të flas për këtë me presidentin Trump,” ka thënë ai./Periskopi/
